ఆంధ్ర మహావిష్ణువు దేవాలయం – శ్రీకాకుళం

మొన్న రాత్రి దూరదర్శన్ వారు ఈ దేవాలయాన్ని చూపించారు. కృష్ణాజిల్లాలో ఉందని చెప్పినట్టు గుర్తు. ఈ దేవాలయం క్రీ.పూ.3 వ శతాబ్దం నాటికే నిర్మించబడి ఉందని ఆధారాలున్నాయిట. మన భారతదేశంలోని అతి పురాతన దేవాలయాలలో ఇదీ ఒకటని చెప్పవచ్చు.

దేశభాషలందు తెలుగులెస్స! అని బోధించి కృష్ణదేవరాయలచే ఆముక్త మాల్యద రచింపచేసింది ఈ స్వామియే. ఈ విషయం ఎంతమంది తెలుగు వారికి తెలుసో నాకు అనుమానమే. ఐనా ఇప్పుడు తెలుగు వేరు, ఆంధ్రభాష వేరు అనుకుంటా.  ఆ కాలంలో ఇన్ని తెలివితేటలు లేవు మరి. 

ఈ స్వామి దేవాలయానికి సంబంధించి ఇంకొక ఆసక్తికరమైన ఇతిహాసం నాకు తెలిసింది ఉంది.  విజయనగర సామ్రాజ్య ప్రాభవంలో వెలిగిన ఈ దేవాలయం, తరువాత సరైన పాలన లేక నిర్లక్ష్యానికి గురి అయ్యిందిట.  అప్పుడు కాసుల పురుషోత్తమ కవి అనే ఆయన ఈ స్వామి పై నిందాస్తుతిగా ఆంధ్ర నాయక శతకాన్ని రచించాడుట. ఇది విని అప్పట్లోని జమీందారు ఈ ఆలయాన్ని మళ్ళీ పునరుద్ధరించాడని చెప్పుకుంటారు.

ఈ ఆంధ్రనాయక శతకం సీస పద్యాలతో రచించ బడింది. అద్భుతమైన ధార, ఆకట్టుకునే శైలి ఈ కవి సొత్తు. మీరు ఈ శతకాన్ని ఇక్కడ చదివి ఆనందిచవచ్చు. 

పద్యాలు చాలా సరళంగా ఉంటాయి. క్లిష్టమైన పదాలకోసం బ్రౌను నిఘంటువు వాడండి.  అర్ధం కాకపోవడం ఉండదు. 

ఈ కవి గురించి మరిన్ని విషయాలు ఇక్కడ తెలుసుకోవచ్చు.